ಕಣ್ಣ ಮುಂದಿನ ತಲ್ಲಣಗಳೇ ಕವಿತೆಯ ಜೀವದ್ರವ್ಯ: ಹಾವೇರಿಯಲ್ಲಿ ಸಾಹಿತಿ ಚಂ.ಸು. ಪಾಟೀಲ ಮನದಾಳದ ಮಾತು
ಹಾವೇರಿ: “ಬದುಕು ಎಂಬುದು ಒಂದು ಕಾವ್ಯ. ನಮ್ಮ ಆಂತರಿಕ ತಳಮಳ ಹಾಗೂ ಬಾಹ್ಯ ತಲ್ಲಣಗಳು ಬದುಕನ್ನು ದುಸ್ತರಗೊಳಿಸಿದಾಗ, ಅವುಗಳಿಗೆ ಪ್ರತಿರೋಧವಾಗಿ ನಾನು ಲೇಖನಿ ಹಿಡಿಯುತ್ತೇನೆ. ನನ್ನ ಕವಿತೆಗಳ ಹುಟ್ಟಿಗೆ ಈ ಸಾಮಾಜಿಕ ಮತ್ತು ವ್ಯಕ್ತಿಗತ ತಲ್ಲಣಗಳೇ ಜೀವದ್ರವ್ಯ,” ಎಂದು ಕೃಷಿಕ ಹಾಗೂ ಸಾಹಿತಿ ಚಂ.ಸು. ಪಾಟೀಲ ನುಡಿದರು.

ನಗರದ ಹಂಚಿನಮನಿ ಆರ್ಟ್ ಗ್ಯಾಲರಿಯಲ್ಲಿ ಭಾವಸಂಗಮ ಸಾಹಿತ್ಯ ಮತ್ತು ಸಾಂಸ್ಕೃತಿಕ ವೇದಿಕೆ ಹಾಗೂ ವಿವಿಧ ಸಂಸ್ಥೆಗಳ ಆಶ್ರಯದಲ್ಲಿ ಆಯೋಜಿಸಲಾಗಿದ್ದ ‘ಪುಸ್ತಕ ಪ್ರೀತಿ’ ಪುಸ್ತಕ ವಿಮರ್ಶೆ ಹಾಗೂ ಸಂವಾದ ಕಾರ್ಯಕ್ರಮದಲ್ಲಿ ಅವರು ಮಾತನಾಡುತ್ತಿದ್ದರು.
ಕೃಷಿ ಬದುಕಿನ ಬವಣೆಯೇ ಕಾವ್ಯ:
ತಮ್ಮ ‘ಕುಳದ ಸಂಗಾತ’ ಕೃತಿಯ ಕುರಿತು ಮಾತನಾಡಿದ ಚಂ.ಸು. ಪಾಟೀಲ ಅವರು, “ನನ್ನ ವೃತ್ತಿ ಕೃಷಿ. ಬಿತ್ತನೆ, ಮಳೆ, ಬೆಳೆ, ಸಾಲ ಹಾಗೂ ಮಾರುಕಟ್ಟೆಯ ದರಗಳ ಏರುಪೇರುಗಳ ನಡುವೆ ರೈತ ಅನುಭವಿಸುವ ಬವಣೆಗಳು ನನ್ನ ಕವಿತೆಗಳಲ್ಲಿ ಧ್ವನಿಯಾಗಿವೆ. ಸಮಾಜದ ಅಸಮಾನತೆ, ಅನ್ಯಾಯ ಹಾಗೂ ಪ್ರಭುತ್ವದ ಲೋಪದೋಷಗಳ ವಿರುದ್ಧ ನನ್ನ ಬರವಣಿಗೆ ಬಂಡಾಯ ಸಾರುತ್ತದೆ,” ಎಂದರು. ಅಲ್ಲದೆ, ಸಾಮಾಜಿಕ ಮಾಧ್ಯಮಗಳು ತಮ್ಮ ಬರವಣಿಗೆಗೆ ವೇಗ ನೀಡಿವೆ ಎಂದು ಅಭಿಪ್ರಾಯಪಟ್ಟರು.

ಬಾಲ್ಯದ ನೆನಪುಗಳ ‘ಚಿಗುರು ಬುತ್ತಿ’:
‘ಚಿಗುರು ಬುತ್ತಿ’ ಕೃತಿಯ ಲೇಖಕಿ ರೂಪಾ ಜೋಶಿ ಮಾತನಾಡಿ, “ಒತ್ತಡದ ಬದುಕಿನ ನಡುವೆ ಮಹಿಳೆಯೊಬ್ಬಳು ಸಾಹಿತ್ಯ ಸೃಷ್ಟಿಸುವುದು ಸುಲಭವಲ್ಲ. ಕೋವಿಡ್ ಸಮಯದಲ್ಲಿ ಬಾಲ್ಯದ ಗೆಳೆಯರು, ಪಾಲಕರ ಪ್ರೀತಿ ಹಾಗೂ ಆಟೋಟಗಳ ನೆನಪುಗಳು ನನಗೆ ನೆಮ್ಮದಿ ನೀಡಿದವು. ಆ ಸನ್ನಿವೇಶಗಳನ್ನೇ ಇಟ್ಟುಕೊಂಡು ಸಿದ್ಧಪಡಿಸಿದ ಕಾದಂಬರಿ ಇಂದು ಚರ್ಚೆಗೊಳಗಾಗುತ್ತಿರುವುದು ಸಂತಸ ತಂದಿದೆ,” ಎಂದರು.

ಅಂತರಾಳದ ನೋವಿಗೆ ಅಕ್ಷರ ರೂಪ:
‘ಉರದ ಪಯಣ’ ಕೃತಿಯ ಲೇಖಕಿ ದ್ರಾಕ್ಷಾಯಿಣಿ ಉದಗಟ್ಟಿ ಮಾತನಾಡಿ, “ಸುತ್ತಮುತ್ತಲಿನ ಪರಿಸರ, ಹೆಣ್ಣಿನ ತಲ್ಲಣಗಳು ಮತ್ತು ಮೌಲ್ಯಗಳ ಪಲ್ಲಟಗಳು ನನ್ನನ್ನು ಕಾಡುತ್ತಿದ್ದವು. ಹಿತೈಷಿಗಳ ಮಾರ್ಗದರ್ಶನದಿಂದ ನನ್ನ ಜೀವನಾನುಭವಗಳನ್ನು ಕವಿತೆಗಳ ರೂಪಕ್ಕೆ ತಂದಿದ್ದೇನೆ,” ಎಂದು ಹಂಚಿಕೊಂಡರು.
ಸಾಹಿತಿಗಳ ತವರು ಮನೆ ಹಂಚಿನಮನಿ ಗ್ಯಾಲರಿ:
ಸಂವಾದದ ಅಧ್ಯಕ್ಷತೆ ವಹಿಸಿದ್ದ ಮಂಜುನಾಥ ಹಟ್ಟಿಯವರ ಮಾತನಾಡಿ, “ಮೂವರು ಲೇಖಕರ ಕೃತಿಗಳು ಅತ್ಯಂತ ಸಂವೇದನಾಶೀಲವಾಗಿವೆ. ಹಂಚಿನಮನಿ ಆರ್ಟ್ ಗ್ಯಾಲರಿಯು ಸಾಹಿತಿಗಳ ತವರು ಮನೆಯಂತೆ ಕಾರ್ಯನಿರ್ವಹಿಸುತ್ತಿದ್ದು, ಮುಕ್ತ ಚರ್ಚೆಗೆ ವೇದಿಕೆ ಕಲ್ಪಿಸುತ್ತಿರುವುದು ಶ್ಲಾಘನೀಯ,” ಎಂದರು.

ಗಣ್ಯರ ಉಪಸ್ಥಿತಿ:
ಕಾರ್ಯಕ್ರಮದಲ್ಲಿ ರೇಣುಕಾ ಗುಡಿಮನಿ ಗೌರವ ಉಪಸ್ಥಿತಿ ವಹಿಸಿದ್ದರು. ಹಿರಿಯ ಸಾಹಿತಿಗಳಾದ ಸತೀಶ ಕುಲಕರ್ಣಿ, ಕರಿಯಪ್ಪ ಹಂಚಿನಮನಿ, ವೇದಿಕೆಯ ಸಂಚಾಲಕ ಶೇಖರ ಭಜಂತ್ರಿ, ಎಸ್.ಆರ್. ಹಿರೇಮಠ, ವಾಗೀಶ್ ಹೂಗಾರ, ಸೋಮನಾಥ ಡಿ. ಬಸವರಾಜ, ತೇಜವತಿ ಎಚ್.ಡಿ., ಯೋಗೇಂದ್ರಾಚಾರ್ಯ, ಚಂದ್ರಶೇಖರ ಮಾಳಗಿ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು.

ಶಿಕ್ಷಕಿ ಭಾಗ್ಯ ಎಂ.ಕೆ. ಕಾರ್ಯಕ್ರಮ ನಿರ್ವಹಿಸಿದರೆ, ಅಂಬಿಕಾ ಹಂಚಾಟೆ ವಂದಿಸಿದರು.
ವರದಿ: ವಿಶೇಷ ವರದಿಗಾರರು, ಹಾವೇರಿ.