ಬೆಂಗಳೂರು: ಅಭಿವೃದ್ಧಿಯ ಹೆಸರಿನಲ್ಲಿ ಬೆಂಗಳೂರು ದಕ್ಷಿಣ ಜಿಲ್ಲೆಯ ರಾಮನಗರ ತಾಲೂಕಿನ ಬಿಡದಿ ಹೋಬಳಿಯಲ್ಲಿ ಫಲವತ್ತಾದ ಕೃಷಿ ಭೂಮಿಯನ್ನು ಸ್ವಾಧೀನಪಡಿಸಿಕೊಳ್ಳುತ್ತಿರುವ ಸರ್ಕಾರದ ಕ್ರಮದ ವಿರುದ್ಧ ರೈತರು ‘ಧರ್ಮ ಕ್ರಾಂತಿ’ ಹೋರಾಟಕ್ಕೆ ಕರೆ ನೀಡಿದ್ದಾರೆ. ಬೈರಮಂಗಲ ಮತ್ತು ಕಂಚುಗಾನಹಳ್ಳಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಒಟ್ಟು 26 ಹಳ್ಳಿಗಳ ರೈತರು ತಮ್ಮ ಭೂಮಿ, ಪರಿಸರ ಮತ್ತು ಸಂಸ್ಕೃತಿಯ ಉಳಿವಿಗಾಗಿ ದನಿ ಎತ್ತಿದ್ದಾರೆ.
ಪ್ರಕರಣದ ಹಿನ್ನೆಲೆ:
ಗ್ರೇಟರ್ ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರವು ಸಮಗ್ರ ಉಪನಗರ ನಿರ್ಮಾಣದ ನೆಪದಲ್ಲಿ ಬಿಡದಿ ಹೋಬಳಿಯ ಸುಮಾರು 9,600 ಎಕರೆ ಭೂಮಿಯನ್ನು ಬಲವಂತವಾಗಿ ಕಿತ್ತುಕೊಳ್ಳುತ್ತಿದೆ ಎಂದು ರೈತರು ಆರೋಪಿಸಿದ್ದಾರೆ. ಈ ಯೋಜನೆಯಿಂದಾಗಿ ಸುಮಾರು 10,000ಕ್ಕೂ ಹೆಚ್ಚು ರೈತ ಕುಟುಂಬಗಳು ಬೀದಿಗೆ ಬೀಳುವ ಭೀತಿ ಎದುರಾಗಿದೆ.
ಯೋಜನೆಯಿಂದಾಗುವ ಭೀಕರ ಪರಿಣಾಮಗಳು:
ರೈತ ಹಿತರಕ್ಷಣಾ ಸಂಘವು ಈ ಯೋಜನೆಯಿಂದ ಉಂಟಾಗುವ ನಷ್ಟಗಳ ಪಟ್ಟಿಯನ್ನು ಬಿಡುಗಡೆ ಮಾಡಿದೆ:

• ಪರಿಸರ ನಾಶ: ಸುಮಾರು 4 ಲಕ್ಷಕ್ಕೂ ಅಧಿಕ ತೆಂಗಿನ ಮರಗಳು ಸೇರಿದಂತೆ ಒಟ್ಟು 10 ಲಕ್ಷ ವಿವಿಧ ಜಾತಿಯ ಮರಗಳ ಮಾರಣಹೋಮವಾಗಲಿದೆ.
• ಕೃಷಿ ನಷ್ಟ: ಸ್ವಾಧೀನಕ್ಕೆ ಒಳಪಡುವ 9,600 ಎಕರೆ ಭೂಮಿಯಲ್ಲಿ ಶೇ. 90ರಷ್ಟು ನೀರಾವರಿ ಪ್ರದೇಶವಾಗಿದ್ದು, ಇಲ್ಲಿ ಸುರ್ವಣಮುಖಿ ಮತ್ತು ವೃಷಭಾವತಿ ನದಿಗಳು ಹರಿಯುತ್ತವೆ.
• ಪಶುಸಂಗೋಪನೆಗೆ ಹೊಡೆತ: 1 ಲಕ್ಷಕ್ಕೂ ಅಧಿಕ ಹಸುಗಳ ನಾಶಕ್ಕೆ ಈ ಯೋಜನೆ ಕಾರಣವಾಗಲಿದ್ದು, ಪ್ರತಿದಿನ 6 ಲಕ್ಷ ಲೀಟರ್ ಹಾಲು ಉತ್ಪಾದನೆ ಕುಂಠಿತಗೊಳ್ಳಲಿದೆ.
• ಉದ್ಯೋಗ ನಷ್ಟ: ಕೃಷಿಯನ್ನೇ ನಂಬಿರುವ 3,000ಕ್ಕೂ ಹೆಚ್ಚು ಕೃಷಿ ಆಧಾರಿತ ಕೂಲಿ ಕಾರ್ಮಿಕರ ಬದುಕು ಅತಂತ್ರವಾಗಲಿದೆ.
  ರೈತರ ಪ್ರಮುಖ ಆರೋಪಗಳು:
• ರಾಜಕೀಯ ಪಿತೂರಿ: ಒಟ್ಟು ಭೂಮಿಯಲ್ಲಿ 2,800 ಎಕರೆ ಸರ್ಕಾರಿ ಗೋಮಾಳವಿದ್ದು, ಇದನ್ನು ಲೂಟಿ ಮಾಡಲು ರಾಜಕಾರಣಿಗಳು ಹವಣಿಸುತ್ತಿದ್ದಾರೆ.
• ಅಭಿವೃದ್ಧಿ ಶೂನ್ಯ: ಕೆ.ಎಚ್.ಬಿ ಯೋಜನೆಯಲ್ಲಿ 20 ವರ್ಷಗಳ ಹಿಂದೆ ಸ್ವಾಧೀನಪಡಿಸಿಕೊಂಡ ಭೂಮಿಯಲ್ಲಿ ಇಂದಿಗೂ ಯಾವುದೇ ಅಭಿವೃದ್ಧಿ ಅಥವಾ ಕಟ್ಟಡಗಳು ನಿರ್ಮಾಣವಾಗಿಲ್ಲ.
• ಅನಿಶ್ಚಿತತೆ: ಬಿ.ಎಂ.ಐ.ಸಿ.ಪಿ.ಎ ಯೋಜನೆಯಡಿ ನೋಟಿಫಿಕೇಶನ್ ಆಗಿ 29 ವರ್ಷ ಕಳೆದರೂ ಪ್ರಕ್ರಿಯೆ ಮುಕ್ತಾಯಗೊಂಡಿಲ್ಲ.
  ರೈತರ ಆಗ್ರಹ:
  “ಅನ್ನದಾತನ ಋಣ ತೀರಿಸುವುದು ನಮ್ಮೆಲ್ಲರ ಕರ್ತವ್ಯ. ಸರ್ಕಾರವು ಭೂದಾಹವನ್ನು ಬಿಟ್ಟು ರೈತರನ್ನು ಮತ್ತು ಪರಿಸರವನ್ನು ರಕ್ಷಿಸಬೇಕು” ಎಂದು ಹೋರಾಟಗಾರರು ಮನವಿ ಮಾಡಿದ್ದಾರೆ. ಇಲ್ಲದಿದ್ದರೆ ಮುಂದಿನ ದಿನಗಳಲ್ಲಿ ರೈತರನ್ನು ಕೇವಲ ವಸ್ತುಸಂಗ್ರಹಾಲಯ ಅಥವಾ ಪುಸ್ತಕಗಳಲ್ಲಿ ಮಾತ್ರ ನೋಡಬೇಕಾದ ಸ್ಥಿತಿ ಬರಲಿದೆ ಎಂದು ಎಚ್ಚರಿಸಿದ್ದಾರೆ.
  ಸಂಪರ್ಕಿಸಿ: ಬೈರಮಂಗಲ, ಕಂಚುಗಾನಹಳ್ಳಿ ಗ್ರಾಮ ಪಂಚಾಯಿತಿಗಳ ರೈತರ ಭೂ ಹಿತ ರಕ್ಷಣಾ ಸಂಘ.
  ದೂರವಾಣಿ ಸಂಖ್ಯೆಗಳು: 9242469431, 9902323515, 973967204.
  ಸ್ಪರ್ಧಾ ನ್ಯೂಸ್ ವರದಿ