SATEESH M K
ಹಾವೇರಿ: “ಮಹಿಳೆಯರಿಗೆ ಇಂದು ಎಲ್ಲಾ ಕ್ಷೇತ್ರಗಳ ಬಾಗಿಲುಗಳು ತೆರೆಯುತ್ತಿವೆ. ವಿವಿಧ ಪಾತ್ರಗಳನ್ನು ನಿರ್ವಹಿಸುವ ಮಹಿಳೆ ತನ್ನಲ್ಲಿರುವ ಸರ್ವ ಶಕ್ತಿಯನ್ನು ಧೈರ್ಯದಿಂದ ಬಳಸಿಕೊಂಡು, ಸ್ಪಷ್ಟ ಗುರಿಯೊಂದಿಗೆ ಸಾಧನೆಯ ಶಿಖರ ತಲುಪಬೇಕು” ಎಂದು ಹಾವೇರಿ ಜಿಲ್ಲಾ ನ್ಯಾಯಾಧೀಶೆ ಹಾಗೂ ಜಿಲ್ಲಾ ಕಾನೂನು ಸೇವಾ ಪ್ರಾಧಿಕಾರದ ಸದಸ್ಯ ಕಾರ್ಯದರ್ಶಿಗಳಾದ ಶ್ರೀಶೈಲಜಾ ಎಂ.ವಿ. ಅವರು ಕರೆ ನೀಡಿದರು.
ನಗರದ ಸಮಾಜ ಕಲ್ಯಾಣ ಇಲಾಖೆಯ ಬಾಲಕಿಯರ ಹಾಸ್ಟೆಲ್-2ರಲ್ಲಿ ಹಾವೇರಿಯ ‘ಸೃಜನಶೀಲ ಉಪನ್ಯಾಸಕರ ವೇದಿಕೆ’ ಹಾಗೂ ಬಾಲಕಿಯರ ಹಾಸ್ಟೆಲ್ ಸಹಯೋಗದಲ್ಲಿ ಮಂಗಳವಾರ ಸಂಜೆ ಹಮ್ಮಿಕೊಳ್ಳಲಾಗಿದ್ದ ‘ವಿಶ್ವ ಮಹಿಳಾ ದಿನಾಚರಣೆ’ ಮತ್ತು ಸಾಧಕ ಮಹಿಳೆಯರಿಗೆ ಸನ್ಮಾನ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.
ಸುಂದರ ಬದುಕು ನಿಮ್ಮ ಕೈಯಲ್ಲಿದೆ
ಮಹಿಳೆಯರು ಅಬಲೆಯರಲ್ಲ, ಪುರುಷರ ಸಹಕಾರದೊಂದಿಗೆ ಉತ್ತಮ ಬದುಕು ಕಟ್ಟಿಕೊಳ್ಳಬೇಕು ಎಂದು ತಿಳಿಸಿದ ನ್ಯಾಯಾಧೀಶರು, “ಸಾಮಾಜಿಕ ಮತ್ತು ಆರ್ಥಿಕ ಸ್ವಾತಂತ್ರ್ಯಕ್ಕಾಗಿ ಶಿಕ್ಷಣ ಅತ್ಯಗತ್ಯ. ವಿದ್ಯಾರ್ಥಿಗಳು ಓದುವ ಹಂತದಲ್ಲಿ ನಕಾರಾತ್ಮಕ ವಿಚಾರಗಳಿಗೆ ಬಲಿಯಾಗಬಾರದು. ಕಾನೂನಿನ ಅರಿವಿಲ್ಲದೆ ಅನೇಕ ಯುವಜನತೆ ಅಪರಾಧ ಕೃತ್ಯಗಳಲ್ಲಿ ಭಾಗಿಯಾಗಿ ಜೈಲು ಶಿಕ್ಷೆ ಅನುಭವಿಸುತ್ತಿರುವುದು ನೋವಿನ ಸಂಗತಿ. ಪ್ರತಿಯೊಬ್ಬರಿಗೂ ಕಾನೂನು ಜ್ಞಾನ ಅವಶ್ಯಕ” ಎಂದರು.
ಸಂವಿಧಾನದಿಂದ ಮಹಿಳಾ ಕ್ರಾಂತಿ
ವೇದಿಕೆಯ ಗೌರವಾಧ್ಯಕ್ಷ ಶೇಖರ ಭಜಂತ್ರಿ ಪ್ರಾಸ್ತಾವಿಕವಾಗಿ ಮಾತನಾಡಿ, “ಶತಮಾನಗಳಿಂದ ಅಡುಗೆ ಮನೆಗೆ ಸೀಮಿತವಾಗಿದ್ದ ಮಹಿಳೆಗೆ ಸಂವಿಧಾನ ಶಿಲ್ಪಿ ಡಾ. ಬಿ.ಆರ್. ಅಂಬೇಡ್ಕರ್ ಅವರು ಕಾನೂನು ಚೌಕಟ್ಟಿನ ಮೂಲಕ ಸಮಾನ ಅವಕಾಶಗಳನ್ನು ನೀಡಿದ್ದಾರೆ. ಇಂದು ಮಹಿಳಾ ಕ್ಷೇತ್ರದಲ್ಲಿ ಕ್ರಾಂತಿಯಾಗಿದ್ದರೆ ಅದಕ್ಕೆ ಸಂವಿಧಾನದ ಬೆಂಬಲವೇ ಕಾರಣ. ಮಹಿಳೆಯರ ಸಾಧನೆಗೆ ಪುರುಷರೂ ಬೆನ್ನಲುಬಾಗಿ ನಿಲ್ಲಬೇಕು” ಎಂದು ತಿಳಿಸಿದರು.
ಜಾಗೃತಿಯ ಕಿವಿಮಾತು
ಕರ್ನಾಟಕ ಅಲ್ಪಸಂಖ್ಯಾತರ ಆಯೋಗದ ಸದಸ್ಯೆ ಪರಿಮಳ ಜೈನ್ ಮಾತನಾಡಿ, “ಮಹಿಳೆಯರು ಇನ್ನೂ ಸಾಮಾಜಿಕ ಕಟ್ಟಳೆಗಳಿಂದ ಹೊರಬರಬೇಕಿದೆ. ಯೌವನದಲ್ಲಿ ದಾರಿ ತಪ್ಪಿದರೆ ಬದುಕು ನರಕವಾಗುತ್ತದೆ. ಸಮಸ್ಯೆ ಎದುರಾದಾಗ ಕಾನೂನು ಪ್ರಾಧಿಕಾರ ಅಥವಾ ಸೇವಾ ಸಂಸ್ಥೆಗಳನ್ನು ಸಂಪರ್ಕಿಸಿ” ಎಂದು ಕಿವಿಮಾತು ಹೇಳಿದರು. ಲೇಖಕಿ ಅನಿತಾ ಮಂಜುನಾಥ ಮಾತನಾಡಿ, ಮಹಿಳೆಯರು ದೊಡ್ಡ ಕನಸುಗಳನ್ನು ಕಂಡು ಅದನ್ನು ನನಸಾಗಿಸುವ ದೃಢ ನಂಬಿಕೆ ಹೊಂದಿರಬೇಕು ಎಂದರು.
ಸಾಧಕಿಯರಿಗೆ ಸನ್ಮಾನ
ಕಾರ್ಯಕ್ರಮದಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ಗಮನಾರ್ಹ ಸಾಧನೆ ಮಾಡಿದ ಗಣ್ಯರನ್ನು ಸನ್ಮಾನಿಸಲಾಯಿತು:
- ಶ್ರೀಶೈಲಜಾ ಎಂ.ವಿ. (ನ್ಯಾಯಾಧೀಶರು)
- ಪರಿಮಳ ಜೈನ್
- ರೇಣುಕಾ ಗುಡಿಮನಿ
- ಲಲಿತಾ ನರಗುಂದ
- ಸಾವಿತ್ರಮ್ಮ ಬಾರ್ಕಿ
- ಅನಿತಾ ಮಂಜುನಾಥ
- ಮಮತಾ ಅಂಚೆರ, ನಂದ ಹೂಗಾರ, ಭಾಗ್ಯಜ್ಯೋತಿ ಮತ್ತು ಫಕೀರಮ್ಮ ಬಾರ್ಕಿ.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಸೃಜನಶೀಲ ಉಪನ್ಯಾಸಕರ ವೇದಿಕೆಯ ಅಧ್ಯಕ್ಷ ಮಂಜುನಾಥ ಹಟ್ಟಿಯವರ್ ಮಾತನಾಡಿ, “ಮಹಿಳೆಯರು ಸಮಾಜದ ಕಣ್ಣು ಇದ್ದಂತೆ. ಸಾಧಕರ ಅನುಭವ ವಿದ್ಯಾರ್ಥಿನಿಯರಿಗೆ ಸ್ಪೂರ್ತಿಯಾಗಲಿ ಎನ್ನುವುದೇ ಈ ಕಾರ್ಯಕ್ರಮದ ಉದ್ದೇಶ” ಎಂದರು.
ಶಿಕ್ಷಕಿ ಸಾವಿತ್ರಮ್ಮ ಬಾರ್ಕಿ ಪ್ರಾರ್ಥಿಸಿದರು, ಪವಿತ್ರ ಸ್ವಾಗತಿಸಿದರು, ಜ್ಯೋತಿ ಅರಸಲಿ ಕಾರ್ಯಕ್ರಮ ನಿರೂಪಿಸಿದರು ಹಾಗೂ ಪ್ರೀತಿ ವಂದಿಸಿದರು.
ವರದಿ: ಸ್ಪರ್ಧಾ ನ್ಯೂಸ್ ನೆಟ್ವರ್ಕ್, ಹಾವೇರಿ.
